Jo shumë kohë më parë, Sabrina Carpenter arriti të bëhej artistja e parë që kishte tre këngë në Top 5 e "Billboard Hot 100" në të njëjtën kohë, duke dëshmuar një sukses të jashtëzakonshëm, pasi diçka të tillë kishin mundur ta bënin vetëm Beatles 60 vjet më parë. 

Por, sukseset e 25-vjeçares nuk ndalen këtu. Këngëtarja e "Espresso" tani do të nderohet me “Çmimin e Suksesit Global” në “BRIT Awards” të këtij viti në ceremoninë e 45-të në Londër.

Dhe çfarë do të thotë kjo?

25-vjeçarja bëhet artistja e parë ndërkombëtare që nderohet me këtë çmim, pasi organizuesit e eventit vendosën këtë vit që të përfshijnë artistë edhe nga jashtë Britanisë.

“Urime Sabrina-s për fitimin e këtij çmimi prestigjioz. Të gjithë pjesëmarrësit në ceremoninë e ndarjes së çmimeve po presin me padurim performancën e saj, e cila premton të jetë një nga pikat kulminante të mbrëmjes”, tha Damian Christian, kryetar i komitetit të “BRIT 2025”.

Ceremonia e ndarjes së çmimeve “BRIT 2025” do të zhvillohet më 1 mars në Londër dhe vlen të theksohet se me këtë çmim janë nderuar në të kaluarën artistë si Adele, Sam Smith, Ed Sheeran, One Direction e shumë të tjerë. Duhet thënë se albumi i këngëtares, "Short n' Sweet", fitoi po ashtu dy çmime Grammy këtë vit.

Artikuj të sugjeruar: