“Big Brother VIP Albania” është konceptuar për të qenë një show që pasqyron realitetin, por me zhvillimet e fundit po kthehet në një telenovelë indiane. Skenari mundësohet nga Gjesti, ndërsa kasti i aktorëve, dikush figurant e dikush me disi më shumë minutazh, mundësohet nga banorët e tjerë.

Rehatohuni!

Në një mbrëmje të mërkure, pas dramës së nishanit, aktori kryesor vendos të bëjë një rreng për banorët e tjerë. Skenari ishte ky: inskenimi i largimit nga shtëpia. Fillimisht, Gjesti mblodhi të gjithë banorët në dhomën e ndenjes, ku shumë shpejt situata eskaloi.

“Sonte do iki.”, tha ai me vendosmëri.

Aq u desh dhe siç e do zakoni, lutjet, të qarat me dënesë dhe kuja e vajtimi me frazën “ishte njeri i mirë”, konkurruan ndjeshëm “Bollywood”.

Dikush e tërhoqi nga krahu, dikush i mbajti fjalim se si ai mund të bënte më mirë dhe të tjerë figurantë iu dorëzuan dhimbjes.

Po Egli?

Një zë u dëgjua. “Dua ta lë shtëpinë edhe unë.” Ishte Egli. Roli i kësaj të fundit ishte lehtësisht i parashikueshëm. Lutje, përgjërime dhe lot, shumë lot. Skena zhvillohej në lavanderi.

Diku më tutje, qahej kujtimi i Gjestit. Lotët e Rozanës lanin çdo gjurmë që ai la në shtëpi. Danja dhe Aldo morën rolin që dinë të bëjnë më mirë, atë të analistëve.

Paralelisht, zemra e Eglit normalizoi rrahjet. Sapo kuptoi që ishte një rreng, nxitoi të mbyllte Gjestin në lavanderi.

Por njësoj si në “Bollywood”, gjërat nuk mund të shkojnë aq vaj për aktorin kryesor. Dikush nuhati diçka. Gerta shfaqi dyshimet e para dhe kërkoi të hidhnin një sy në lavanderi.

Suspancë. Seria e ardhshme premton spektakël.

Ne parashikojmë se kjo telenovelë do të ulë ndjeshëm numrin e abonentëve shqiptarë në Netflix. Gjithsesi, jemi këtu deri në përfundim të kësaj telenovele.

Natën e mirë dhe paçi fat!