Foto: Raimonda Kulikauskiene/Getty Images

Nëse e mendon manikyrin thjesht si pjesë të rutinës së bukurisë, është koha ta shohësh ndryshe, lyerja e thonjve është po aq aksesor mode sa çanta apo këpucët. Pra, pse të mos zgjedhësh një ngjyrë që funksionon me gjithçka?

Më poshtë, janë disa nga ngjyrat më të sigurta që shkojnë me çdo stil, ngjyrë dhe rast. Po, edhe me atlete, edhe me kostum klasik. Disa janë të pritshme, por disa të tjera mund të të surprizojnë.

Nude: Klasikja që nuk dështon kurrë

Ashtu si takat nude janë një pjesë “thelbësore” e çdo garderobe sipas stilistëve, edhe manikyri nude është një domosdoshmëri. Shkon me gjithçka, nga ngjyrat neutrale te ato të ndezura si rozë apo jeshile, nga xhinsi deri te tantella apo lëkura. Dhe mbi të gjitha, është i përshtatshëm për çdo sezon.

E kuqja "verë e errët": Delikate dhe elegante

Që nga vitet ’90, kjo ngjyrë është kthyer në sinonim të finesës. Shkon perfekt me veshje të zeza, luksoze ose edhe nuanca të lehta, sepse krijon kontrast. Një kombinim shumë harmonik, veçanërisht në dimër.

E kuqja qershi: Drama që duam

Nëse do të luash me vëmendjen dhe klasin, të duhet një manikyr me ngjyrë qershie. Shkon po aq mirë me një fustan veror të guximshëm, sa edhe me xhinse, një T-shirt dhe një pallto bezhë në dimër. Nëse je e fiksuar pas gjërave që kombinojnë, provo t'i kombinosh me një veshje të kuqe, do të dukesh wow.

E bardha: E pastër dhe e freskët

Nuk ka asgjë më “të freskët” sesa një manikyr i bardhë. I thjeshtë, minimal, por i fuqishëm. Mund të vishet si me fustane ngjyra-ngjyra, ashtu edhe me një kostum klasik për punë. Një opsion që nuk dështon asnjë ditë të javës.

Rozë shumë e çelur: Pa mundim, por super efektive

Nëse do një manikyr që thjesht funksionon me gjithçka – kjo është zgjedhja. Rozë e lehtë është si vaji i ullirit në kuzhinë: gjithmonë e dobishme. Jep një pamje të pastër, femërore dhe shkon nga nuancat e ngrohta deri tek të ftohtat. Sidomos bukur me bluzat me qëndisje apo nuanca toke si kafe e lehtë apo jeshile e butë.