Noizy/ Instagram

Pas disa ditësh të tensionuara, Noizy është liruar nga paraburgimi në Zvicër, ku ishte përfshirë në një procedurë hetimore për shkak të asaj që ai e cilëson si “shpifje e pastër”. Reperi reagoi menjëherë pas lirimit me një postim në Instagram, ku ndau versionin e tij të ngjarjes dhe kërkoi ndjesë për performancën e anuluar në Rinora4, të shtunën mbrëma.

“Ju kërkoj ndjesë të gjithë fansave të mi në Zvicër, për të cilët, fatkeqësisht, nuk munda të performoja të shtunën mbrëma në Rinora4. Një keqkuptim i rëndë, i shkaktuar nga një shpifje e pastër, më përfshiu padrejtësisht në një procedurë verifikimi nga autoritetet zvicerane. Autori i kësaj shpifjeje do të përballet me pasojat ligjore. Tani gjithçka është pas krahëve. Jam sërish me ju, për të çuar përpara koncertet dhe albumin e ri. MAMA IA DOLA.”

Postimi është pritur me entuziazëm nga fansat, që kanë shprehur mbështetje të menjëhershme në komente, duke i uruar rikthim të shpejtë në skenë dhe sukses me albumin e ri.

Noizy kishte paralajmëruar projekte të shumta verore, përfshirë koncerte në Europë dhe një lançim të rëndësishëm muzikor. Me gjithçka “pas krahëve”, siç tha vetë, duket se rikthimi i tij në rrugën muzikore është vetëm çështje ditësh. Përsa i përket atyre që Noizy i quajti "autorë të kësaj shpifjeje", duket se do të përballen me pasojat e caktuara ligjore, sipas deklaratës së Noizy-t.