Kartolina e Albano Bogdos për vitin e ardhshëm mund të themi që i drejtohet më së shumti problemeve, në vend të gëzimeve që ky vit la pas.
I ftuar në emisionin Quo Vadis në Vizion Plus, ai bëri një përmbledhje për mënyrën se si reflektohet në media realiteti; mbi mënyrën se si dhe sa të gatshëm janë artistët për të folur në emisionet ku ftohen për problemet e vërteta në vend të disa argëtimeve apo arritjeve të momentit.
"Arti në Shqipëri po bën një punë të jashtëzakonshme. Edhe në media në përgjithësi. Po, arti, arti. Nuk po tallem fare. Artistët edhe media dhe të gjithë po i mbushin mendjen njerëzve që ne do të shkojmë në BE tani. Tani çdo gjë është në rregull dhe hajde të qeshim, të gëzojmë, të festojmë Krishtlindjet. O sa bukur, ky na bëri për të qeshur, ky punon në teatër, ky punon në opera, filloi Big Brother-i, do fillojë ferma. Nuk del asnjë artist të thotë ne jemi në dhjetëshen e parë të vendeve me më shumë ujë për kokë dhe asnjë familje nuk ka 24 orë në 24 ujë të rrjedhshëm në shtëpi. Në këto lumenj madhështorë mund të ndërtohen hidrocentrale dhe ta kemi korentin falas. Fatura e korentit është makthi më i madh i familjeve shqiptare. Anjë artist ose media nuk del të thotë që paga mesatare u rrit nga 400 mijë lekë të vjetra në 500 mijë lekë të vjetra..."
Lista e tij vazhdon. Teksa numri i shqetësimeve rritet, reagimi i tij ndaj artistëve bëhet edhe më i ashpër.
"Kjo është kartolina ime për vitin e ri, artistët janë një m*t i madh në Shqipëri! Të gjithë gënjejnë dhe janë të gjithë të blerë! Të gjithë ulin kokën se kanë frikë nga pronarët e mediave dhe nuk thotë askush të vërtetën në sy. E vërteta është se ne jemi një komb fatkeq dhe shyqyr që kemi këto festat që të takojmë e të puthim njëri-tjetrin. Kjo është kartolina ime.”
