Pak orë pas sulmit të Shteteve të Bashkuara në Venezuelë dhe kapjes së Nicolás Maduro, presidenti i SHBA-së Donald Trump publikoi në rrjetin social Truth Social një foto të tij në bordin e një anijeje me sy të lidhur.
Fotoja u përhap me shpejtësi në internet, jo vetëm për pamjen e nënshtruar të Maduro-s, por edhe për veshjen e tij, një kostum sportiv gri Nike Tech.
Xhaketat, pantallonat dhe kostumet Nike Tech kanë qenë objekt diskutimesh muajt e fundit, pasi një trend në rrjetet sociale ka nxitur djemtë të heqin dorë nga ky stil veshjeje dhe ta zëvendësojnë atë me bluza pak të trasha me zinxhir tek pjesa e qafës. Kjo, pasi këto të fundit konsiderohen më elegante.
Videoja e një përdoruesi të TikTok, e publikuar në nëntor të vitit të shkuar, ku thuhej se Nike Tech ishte jashtë mode, arriti të mblidhte rreth 30 milionë shikime brenda një muaji.
Veshja e Maduro-s largoi vëmendjen nga zhvillimet politike dhe ajo foto e tij u kthye në burim memesh e videosh në rrjetet sociale.
Sipas Google Trends, termi “Nike Tech” shënoi një rritje të ndjeshme në kërkimet në Google të shtunën në mëngjes, më 3 janar, menjëherë pas postimit të Trump në Truth Social.
Në TikTok dhe Instagram, shumë postime që përfshijnë foton e Maduro-s kanë komente që bëjnë shaka me veshjen e tij, si: “ Pse or mik ke veshur Nike Tech ?” dhe “Ky nuk e di që tani janë në modë quarter-zips.”
Postime të tjera madje spekuluan se veshja mund të ishte zgjedhur qëllimisht. Sidoqoftë, shitjet e kostumit Nike janë rritur ndjeshëm dhe me gjasë, ekipi i marketingut po feston.
