Të gjithë përgatituni shpirtërisht: sezoni i dytë i "Wednesday" është më afër se kurrë dhe traileri sapo na dha gjithçka që (nuk) do donim të shihnim. Netflix publikoi pamjet e para të kapitullit të ri gotik më 9 korrik – që sigurisht do të ishte një ditë e mërkurë – dhe ato janë një miks i zymtësisë, humorit të errët dhe dhimbjes së parashikuar.
Jenna Ortega rikthehet në rolin e ikonikes Wednesday Addams dhe këtë herë, ajo nuk po përballet thjesht me drama adoleshentësh me superfuqi, por me një vizion që e trondit thellësisht, shoqja e saj më e mirë, Enid (Emma Myers), vdes. Dhe Wednesday është e bindur që është faji i saj.
“Enid vdes dhe është i gjithi faji im”, dëgjohet ajo duke iu rrëfyer Morticia-s (Catherine Zeta-Jones), ndërsa premton “Do e shpëtoj ose do vdes duke u përpjekur”.
Ndërkohë, në Nevermore, ajo përballet me famën e papritur si “shpëtimtarja” e shkollës, por siç e dimë të gjithë, Wednesday nuk është tipi që i pëlqejnë duartrokitjet. Në vend të lavdisë, ajo ka një punë më të rëndësishme, të ndalojë së ndodhuri atë që ka parë në vizion.
Pamjet tregojnë gjithashtu fytyra të reja në kast, përfshirë Steve Buscemi si drejtori i ri i Nevermore, si dhe kthimin e aktorëve të dashur nga sezoni i parë. Dhe nëse kjo nuk mjafton, Lady Gaga do të shfaqet si e ftuar speciale, ndërsa Christopher Lloyd, aktori origjinal i Uncle Fester nga filmi i vitit 1991, do të bëjë një dalje të beftë në serial.
Sezoni 2 do të ndahet në dy pjesë: katër episode më 6 gusht dhe katër të tjera më 3 shtator, të dyja të mërkurave, siç e do tradita Addams.
Me më shumë mister, më shumë të vdekur të parashikuar dhe më shumë stil gotik, Wednesday po vjen për të na mbërthyer sërish.
