Beyonce shënon fitoren e radhës. Ylli i muzikës pop është zyrtarisht një miliardere.
Sipas Forbes, me këtë rekord, ajo i bashkohet një grupi shumë të vogël personazhesh të famshëm që kanë kaluar pragun e miliardës.
Beyonce është këngëtarja e pestë që gëzon këtë status. Tashmë emri i saj do të renditet krah bashkëshortit, Jay-Z, Taylor Swift, Bruce Springsteen dhe Rihanna-s, katër këngëtarëve të tjerë të cilët janë prej kohësh pjesë e listës së Forbes.
Beyonce arriti të themelojë perandorinë e saj të biznesit në vitin 2010, kur themeloi Parkwood Entertainment dhe mori nën kontroll pothuajse çdo gjë sa i takonte karrierës së saj.
Kompania menaxhon aktivitetin e saj dhe prodhon gjithë muzikën, dokumentarët dhe koncertet.
Sipas saj, arsyeja e marrjes së atij vendimi ishte sepse ajo dëshironte të menaxhonte vetë gjithçka kishte pa qenë e detyruar të ndante asnjë pjesë të parave të saj me të tjerë.
“Kur vendosa ta menaxhoja veten, ishte e rëndësishme të mos shkoja te ndonjë kompani e madhe menaxhimi. Doja të ndiqja hapat e Madonna-s, të isha një forcë e madhe dhe të kisha perandorinë time – dhe t’u tregoja grave të tjera se, kur arrin në këtë pikë të karrierës, nuk ke pse të firmosësh me dikë tjetër dhe të ndash paratë apo suksesin. Mund ta bësh vetë,” u shpreh ajo në një intervistë në vitin 2013.
Edhe pse Beyonce e ka zgjeruar perandorinë e saj në industri të ndryshme, pjesa më e madhe e pasurisë së saj vjen nga muzika.
Mjafton të kujtojmë Cowboy Carter Tour. Përmes këtij turi ajo fitoi mbi 400 milionë dollarë nga shitja e biletave dhe rreth 50 milionë dollarë nga produktet e shitura gjatë shfaqjeve.
Duke kombinuar të ardhurat nga turneu, katalogu muzikor dhe marrëveshjet sponsorizuese, Forbes vlerëson se ajo fitoi 148 milionë dollarë në vitin 2025.
