Ndërsa ish-bashkëshorti i saj, Kevin Federline, e fajëson në librin e tij të ri autobiografik për problemet në marrëdhënien e tyre, Britney Spears ka reaguar në mënyrën e saj karakteristike: përmes një postimi në Instagram.
Ylli i pop-it publikoi një foto të saj mbi kalë, me supet e zhveshura, duke i krahasuar ato me “krahë” dhe duke iu referuar filmit të Disney-t Maleficent.
“A ju kujtohet mbreti që u përpoq ta vriste, por në vend të kësaj një djalë i preu krahët?
Krahët e saj ishin të shenjtë, ndaj mbreti nuk mund t’i prekte,” – shkroi Spears, duke lënë të kuptohet se edhe ajo e ndien veten si dikush që i janë prerë“krahët”.
Në të njëjtin postim, ajo kujtoi periudhën e vitit 2018, kur u detyrua të kalonte një program rehabilitimi në Beverly Hills, përvojë që e përshkroi si “traumatike”.
“Ndihesha sikur më kishin prerë krahët. Nuk më lejohej të shkoja askund. Ka shumë gjëra që nuk i kam ndarë as në librin tim, dhe shumë të tjera që i mbaj ende sekret, sepse janë tepër të dhimbshme,” – shkroi ajo.
Në autobiografinë e saj të vitit 2023, The Woman In Me, këngëtarja rrëfen se ishte babai i saj, Jamie Spears, ai që e detyroi të kalonte më shumë se tre muaj në qendrën e rehabilitimit. Aty, ajo thotë se u mbajt kundër vullnetit të saj, iu dha litium dhe iu kufizua çdo liri personale.
“Më mbanin të mbyllur për muaj të tërë. Nuk mund të dilja jashtë, nuk mund të ngisja makinën, as të bëja dush vetëm. As nuk më lejonin të mbyllja derën e dhomës sime të gjumit,” – kujton Spears në libër.
Pas asaj periudhe të errët, këngëtarja u përfshi në një betejë të gjatë ligjore për t’u çliruar nga kujdestaria e babait të saj, e cila mori fund në vitin 2021. Sot, pavarësisht plagëve të së kaluarës, Britney duket e vendosur të tregojë historinë e saj me zërin e vet.
