Cher shpall gabimisht këngëtarin e ndjerë si fitues të Grammy-t

Foto: Cher/ Getty Images

Ikona e muzikës pop Cher ishte caktuar të shpallte çmimin “Record of the year” gjatë ceremonisë Grammy 2026, por duket se u shpërqendrua nga detyra, ndërsa filloi të fliste për karrierën e saj dhe madje tentoi të largohej nga skena pa thënë një emër. 

Shënim: "Record Of The Year" merret me një regjistrim specifik të një kënge dhe vlerëson artistët, producentët dhe të gjithë të tjerët që kanë kontribuar në regjistrimin e këngës.

Moderatori Trevor Noah e ndaloi, duke i kërkuar të shpallte çmimin përpara se të largohej (fundja kjo ishte arsyeja pse u ngjit në skenë).

Ajo u rikthye dhe, pasi hapi zarfin bëri gafën e radhës. Plot entuziazëm, tha emrin e këngëtarit të ndjerë Luther Vandross si fitues, ndonëse çmimi në fakt i përkiste Kendrick Lamar dhe SZA për këngën “Luther”.

Ajo e korrigjoi shpejt veten, duke thënë se çmimi në të vërtetë i takonte Kendrick Lamar-it.

Ngatërresa ka të ngjarë të ketë ardhur për shkak se fituesi ishte Kendrick Lamar ft SZA për këngën “Luther”, në të cilën përfshihet një pjesë e Vandross duke kënduar “If This World Were Mine”. E kështu, Cher u bë lëmsh.

Luther Vandross fitoi tetë çmime Grammy gjatë karrierës së tij dhe u nominua plot 33 herë. Ai ndërroi jetë në vitin 2005 në moshën 54-vjeçare.

Fansat reaguan menjëherë në rrjetet sociale dhe përpos gafës komentet ishin kryesisht pozitive:

“Cher tha që Grammy shkon për Luther Vandross. Në fakt, nuk ishte edhe aq larg. Më pëlqeu që ajo e përmendi. Ai na mungon shumë,” shkroi një përdorues në Twitter.

Ndërsa një tjetër bëri shaka:

“Më pëlqen shumë sa e emocionuar ishte Cher kur u kthye për t’i dhënë ‘Grammy-n’ Luther Vandross.”

Cher ka një karrierë muzikore mbi gjashtë dekada, që filloi në vitet 1960, dhe ka fituar Grammy, përfshirë atë të vitit 1998 për hitin “Believe”.