Marius Borg Høiby, djali i madh i princeshës së kurorës së Norvegjisë, Mette-Marit, është zyrtarisht i akuzuar për 32 vepra penale, përfshirë të paktën katër akuza për përdhunim, pas një hetimi të gjerë të autoriteteve norvegjeze.
Prokurorja e Oslos, Sturla Henriksbø, konfirmoi më 18 gusht se Høiby është ndjekur penalisht pas një hetimi të gjatë dhe të detajuar. Sipas akuzës, përveç përdhunimeve të dyshuara, ai përballet edhe me akuza për dhunë në familje, dhunë fizike, prishje të rendit publik, vandalizëm, shkelje të urdhrave të ndalimit dhe filmim të grave pa pëlqimin e tyre.
Katër rastet e përdhunimit dyshohet se kanë ndodhur në vitet 2018, 2023 dhe 2024. Po ashtu, Høiby ka pranuar fajësinë për një akt dhune të ndodhur në gusht 2024, për të cilin ishte arrestuar.
Avokati i tij mbrojtës, Petar Sekuli, deklaroi se klienti i tij "i mohon të gjitha akuzat për abuzim seksual, si dhe shumicën e akuzave që lidhen me dhunën fizike". Sipas Sekulit, Høiby do të “paraqesë në mënyrë të detajuar versionin e tij në gjykatë” dhe është i gatshëm të bashkëpunojë me drejtësinë.
#BREAKING Norwegian police said Tuesday that Marius Borg Hoiby, the 27-year-old son of Norwegian Crown Princess Mette-Marit, has been arrested on suspicion of rape pic.twitter.com/JYBb495g3i
— AFP News Agency (@AFP) November 19, 2024
Marius Borg Høiby, i cili është 28 vjeç dhe nuk mban asnjë titull mbretëror apo funksion zyrtar në monarki, ka qenë shpesh në qendër të vëmendjes për shkak të sjelljeve problematike dhe arrestimeve të mëparshme. Ai është djali biologjik i princeshës Mette-Marit dhe u rrit si pjesë e familjes mbretërore pas martesës së saj me Princin Haakon.
Sipas prokurorisë, procesi gjyqësor pritet të nisë në mes të janarit 2026 dhe të zgjasë rreth gjashtë javë. Aktualisht, Høiby ndodhet në gjendje të lirë në pritje të gjyqit, pasi autoritetet nuk shohin ndonjë rrezik që ai të largohet apo të pengojë hetimet.
Pallati Mbretëror i Norvegjisë reagoi duke theksuar se çështja i përket sistemit të drejtësisë dhe jo institucionit të monarkisë. Megjithatë, Princi i Kurorës, Haakon, dha një deklaratë publike pas publikimit të akuzave:
“Ne do të vazhdojmë të përmbushim detyrat tona me përkushtim, si gjithmonë. Kjo është padyshim një situatë e vështirë për të gjithë të përfshirët,” tha ai për gazetarët.
