Ish-asistentja e Kanye West, Lauren Pisciotta, ka zgjedhur të fshihet për të shpëtuar jetën e saj, pasi pretendon se ka frikë se mos e vrasin pas ngritjes së padisë për sulm seksual ndaj reperit të njohur.
Pisciotta, 36 vjeçe, nisi të punonte për ëest në vitin 2021 dhe më 3 qershor 2024 dorëzoi padinë e parë, duke e akuzuar atë për ngacmim seksual dhe përndjekje. Në një version të përditësuar të padisë, dorëzuar më 10 korrik 2025, ajo e akuzon reperin, i njohur edhe me emrin Ye, për trafikim seksual, përndjekje, dhunë dhe përdhunim.
Procesi civil pritet të rikthehet në gjykatë muajin e ardhshëm, por sipas avokatit të saj, Arick Fudali, klientja e tij është “e frikësuar” dhe e tërhequr nga jeta publike.
Në një intervistë për BBC-në, avokati Fudali deklaroi se Pisciotta “thjesht është izoluar, duke lënë që procesi gjyqësor të ndjekë rrjedhën e vet”.
“Është shumë e trishtë, ajo ka kaluar shumë. Ka vuajtur dhe vazhdon të vuajë që nga momenti kur nisi të punonte për z. West,” tha ai.
Sipas padisë së përditësuar, Pisciotta pohon se ka qenë viktimë e një sulmi të qëllimshëm “swatting” (raportimi i rremë i një krimi të rëndë për të nxitur ndërhyrjen e policisë me forcë).
Gjashtë ditë pas dorëzimit të padisë fillestare, ajo pretendon se u përball me një bastisje të armatosur nga policia në Florida, pas një denoncimi të rremë se ajo kishte vrarë nënën e saj.
Ajo gjithashtu thotë se ka marrë telefonata anonime ku e kërcënonin që të hiqte dorë nga padia, duke i thënë se nuk do të “fitojë kurrë kundër Kanye West”.
Në padi thuhet se gjatë punës për albumin DONDA, West e ka ndjekur Pisciottën në dhomën e saj të hotelit, duke pretenduar se donte të përdorte dushin. Ajo pretendon se më pas ai doli nga banja, hoqi peshqirin dhe e përdhunoi.
Sipas saj, West gjithashtu kryente marrëdhënie seksuale me punonjës të kompanisë së tij, Yeezy, në ambientet e zyrës, i regjistronte aktet dhe ia dërgonte asaj. Ai i dërgonte shpesh mesazhe me përmbajtje seksuale, duke përfshirë fantazi të shprehura për të.
Në dokumentet e gjykatës, Pisciotta pretendon se punonjësit ishin të ekspozuar vazhdimisht ndaj deklaratave raciste dhe antisemitike të ëest.
Megjithatë, ekipi ligjor i këngëtarit ka mohuar kategorikisht këto akuza.
