Foto: Fifi/ Andale Media

E ftuar në "The Dalina Show" në Andale Media, Fifi ka rikujtuar dhe komentuar disa nga konfliktet më të bujshme publike që ajo ka pasur me personazhe të tjera. 

Mentor Haziri

Komenti i Fifit:

"Isha duke e menduar para disa ditëve kur filloi 'Big Brother VIP Kosova' që u fut Mentori, i thashë Adisit 'unë s'flas me Mentorin' dhe më tha mua 'pse?' dhe i thashë unë 'nuk e mbaj mend, diçka për Këngën Magjike është'. Madje 100% po ta shihja dikur në rrugë, do kisha shkuar duke thënë 'ku je?' e ai do më thoshte 'po ne s'flasim'. Ai ka pasur diçka me mua, unë s'e di. Më ka dhënë 0 pikë [te Kënga Magjike], po unë s'jam mërzitur me të. Me 'Marova' [më dha 0 pikë]."

E vërteta:

Në 2018-ën, Mentor Haziri surprizoi kur votoi në Këngën Magjike me vetëm 4 pikë "Psikopatja jote", bashkëpunimin e njohur të Fifit me McKreshën. Një vit më vonë Mentori u shpreh në media se:

“Thjesht ka qenë performanca më e dobët e festivalit. Stonatura ka qenë e jashtëzakonshme. Nuk ka qenë këngë e keqe, e mirë ka qenë. Fatkeqësisht se di çfarë ndodhi aty edhe me Fifin edhe me Kreshën.”

Në një reagim të gjatë, Fifi iu kundërpërgjigj më tej Mentorit duke thënë:

"Po më vjen keq që një artist merret akoma me diçka që ka kaluar dhe nuk merret me projekte po me llafe si gratë. Mbi të gjitha je mashkull. Po më vjen keq që ke marrë 3 vjet pjesë në po të njëjtin festival të cilit nuk i kanë ndërruar rregullat."

Anna Lika

Komenti i Fifit:

"I kemi rregulluar marrëdhëniet. Se ç'doli dhe tha 'fuçi uthulle' për mua. Kur i rregullova marrëdhëniet i thashë ç'pate me këtë 'fuçi uthulle'? 'Hë me hë', tha. S'ka gjë, iku."

E vërteta:

E ftuar në emisionin “Pop Sugar” në Radio Travel në tetor të 2018-ës, Ana Lika u bë pjesë e një loje. Ajo duhet të komentonte 11 VIP-a, pa u përmendur emrin. Mirëpo kur erdhi radha tek Fifi, Ana theksoi se nuk e kishte problem t'i përmendte emrin, duke komentuar peshën e Fifit dhe duke përdorur përcaktorë si “fuçi uthulle” dhe “balenë”.

Arjola Demiri

Komenti i Fifit:

"Me Arjolën nuk flas. Kurrë s'e kam kuptuar pse nuk flas me Arjolën. Që më ka bërë block e di, por pse nuk e kam kuptuar. [sepse Fifi doli në mbështetje të Donald Veshajt në finalen e 'BBVA 1'] Po ishte i vetmi që qau [Donaldi], kur dola unë nga shtëpia. Nuk e besoj që e kam quajtur Arjolën 'njeri të padëshiruar'."

E vërteta:

Marrëdhënia e Arjolës me Fifin u duk se nuk ishte më si më parë kur Fifi mbështeti publikisht Donaldin.

Gjatë një loje në rubrikën “Hëna apo Dielli” në “E diell”, Monika Lubonja i bëri një rreng në telefon Fifit duke i thënë se ishte e habitur që ajo kishte folur mbrapa krahëve për të. Pasi i tha se po bënte shaka, Fifi në një moment përmend se “kishte shumë njerëz të padëshiruar në ditëlindjen e saj (Monikës)”.

E pyetur nga Nevina Shtylla se për cilët njerëz bëhet fjalë, Fifi u shpreh: “Një njeri që më ka bërë bllok në Instagram është Arjola, kështu që... (qesh)”.

Donald Veshaj

Komenti i Fifit: (Donaldi vendosi lule në vendin ku i ra të fikët Fifit në shtëpi)

"Ajo ishte shumë e shëmtuar. Më tha 'më fal, nuk e dija që e kishe marrë për keq'. Gjithsesi, e kemi sqaruar."

E vërteta:

Gjatë puntatës së parë të programit "Më lër të flas", i moderuar nga binjakët Veshaj, një situatë nervozoi keq Fifin. Një nga të ftuarit e mbrëmjes ishte Mozzik, i cili bashkë me Donaldin në një moment hyjnë në shtëpinë e BBV. Ky i fundit, teksa i tregonte reperit ambientet e shtëpisë së famshme, vendos lule fiks në vendin ku Fifi ra pa ndjenja. 

Për këtë, Fifi reagoi ashpër:

"Të gjithë e dinë arsyen pse unë kam dalë nga Big Brother ashtu siç dinë se që nga momenti kur kam dal kam refuzuar ta shohë atë skenë. Sot, kur shoh atë lulen në tokë që gjasme "këtu vdiq Fifi", atëherë unë po ju them përgatituni me gjyqin," tha ajo gjatë një videoje live të bërë menjëherë pas programit.

Megjithatë, dyshja më vonë i treguan publikut se kishte qenë e gjitha një shaka:

Donaldi "reagoi" përmes disa Instastory-sh ku u përpoq të vazhdonte me humor situatën e nisur prej Fifit. "Nuk e kuptoj Fifin, tha që do ndjekë anën ligjore, edhe unë jam gati ta vazhdoj. Po përgatis avokatët e mi," dëgjohet të thotë Donaldi, kur papritur në video shfaqet Fifi. Kjo e fundit nga ana tjetër ndoqi po të njëjtën linjë në Instastory-n e saj, ku në fund tregoi se pranë saj qëndronte Donaldi.