Aktorja e njohur, Jennifer Lawrence, ka mbajtur një qëndrim të fortë publik në mbështetje të Palestinës, duke e cilësuar situatën në Rripin e Gazës si “asgjë më pak se gjenocid”. Ky koment erdhi të premten gjatë një konference për shtyp në Festivalin e Filmit në San Sebastian.
“Po dridhem sepse është poshtëruese.
Ajo që po ndodh nuk është asgjë më pak se gjenocid dhe është e papranueshme”, – tha Lawrence, 35 vjeçe, kur u pyet për konfliktin në Lindjen e Mesme.
Fituesja e çmimit Oscar dhe nënë e dy fëmijëve, shprehu shqetësimin për pasojat e kësaj situate, jo vetëm për popullin palestinez, por edhe për brezat e rinj kudo në botë.
“Kam frikë për fëmijët e mi, për të gjithë fëmijët. Është shumë e trishtë që mungesa e respektit dhe retorika përçarëse në politikën amerikane po bëhen normale për të rinjtë,” – shtoi ajo.
Lawrence theksoi se votuesit e rinj po rriten me idenë se politika është e pandershme, se politikanët gënjejnë pa u ndëshkuar dhe se mungesa e empatisë është e pranueshme. Ajo shtoi se heshtja përballë padrejtësive në një pjesë të botës mund të sjellë pasoja edhe në vende të tjera.
“Do të doja të mund të thosha apo bëja diçka që do ta rregullonte këtë situatë jashtëzakonisht të dhimbshme dhe të gabuar moralisht. Por shpeshherë frika jonë për të folur është sepse fjalët tona keqinterpretohen ose përdoren për të ndezur më shumë urrejtje.
Megjithatë, është e rëndësishme të mos harrojmë kush mban përgjegjësi, çfarë mund të bëjmë dhe kur është koha të ngrihemi e të votojmë.”
Lawrence është shprehur më parë për ndryshimet në bindjet e saj politike. Në një intervistë të vitit 2020, ajo zbuloi se në zgjedhjet e saj të para votoi për republikanin John McCain.
E lindur në një familje konservatore në Kentucky, Lawrence ka deklaruar se me kalimin e kohës ka ndryshuar qëndrimet e saj politike, sidomos për shkak të mospërputhjes së vlerave sociale me politikat e djathta.
