Duket se Katy Perry dhe Orlando Bloom nuk janë më në të njëjtën frekuencë emocionale.
Burime për revistën People kanë konfirmuar se këngëtarja 40-vjeçare dhe aktori britanik 48-vjeçar janë ndarë zyrtarisht, duke i dhënë fund një marrëdhënieje që zgjati thuajse një dekadë – përfshirë një fejesë, një vajzë të përbashkët dhe shuuumë rikthime pas ndarjesh të vogla.
Katy dhe Orlando u njohën në një festë të Golden Globes në 2016, duke luftuar – jo për vëmendje – por për një hamburger.
"Ai as nuk ishte ulur në tavolinën tonë," kujtonte Perry në një intervistë për American Idol. "Zgjati dorën për të marrë hamburgerin tim dhe unë i thashë: ‘Hej, është i imi ky!’"
Kaq mjaftoi që lidhja të fillonte, të bëhej “Instagram-official” në Kanë dhe më pas të ndalonte për pak në vitin 2017. Megjithatë, të dy kanë qenë të hapur për marrëdhënien e tyre dinamike. “Jemi të rritur, jemi miq, nuk ka dramë,” tha Orlando Bloom pas ndarjes së parë. Spoiler: kishte dramë, por të menaxhueshme.
Pas një rikthimi në vitin 2018 dhe disa dalje zyrtare në tapetin e kuq, Orlando Bloom i propozoi Katy Perry-t në ditën e Shën Valentinin të vitit 2019 – me miratimin e prindërve të saj, siç e kërkon tradita. Më vonë, Katy konfirmoi shtatzëninë në klipin “Never Worn White” dhe në gusht 2020, lindi vajza e tyre, Daisy Dove.
Dasma e planifikuar në Japoni u shty për shkak të pandemisë, por çifti vazhdoi të mbështeste njëri-tjetrin profesionalisht. Por, siç ndodh me shumicën e romancave që fillojnë me një hamburger dhe përfundojnë me një ftohje të ngadaltë, diçka s’funksionoi.
Në intervistat e fundit, Katy fliste me shumë finesë për anët “spirituale dhe të egos” që përplaseshin mes tyre. Për një moment dukej sikur ata të dy e kishin kuptuar “dashurinë e pjekur”. Por, edhe dashuria e pjekur lodhet. Dhe ndonjëherë, nuk ka as faje, as dramë në mes – thjesht, lidhja nuk ecën më.
Burimi: People
