Autizmi, ose Çrregullimi i Spektrit të Autizmit (shkurt ASD) është një gjendje e komplikuar neurologjike, e cila shkaktohet nga një sërë faktorësh, duke përfshirë gjenet dhe mjedisin, të cilat ndërveprojnë në mënyrë që ende s’i kuptojmë. Edhe simptomat variojnë, që nga mungesa e aftësive shoqërore, e deri tek paaftësi për të folur, a procesuar ndjesitë normalisht. Këto tipare të komplikuara të sindromës komplikojnë edhe mënyrën si diagnostikohen fëmijët. Fëmijët shfaqin shenja të autizmit që 18-muajsh, por nuk ekziston një test i vetëm mjekësor që mund ta diagnostikojë dhe zakonisht duhen vite që të konfirmohet dyshimi, duke vonuar trajtimin.

Një studim i ri, i publikuar këtë të dielë, mund të sigurojë zgjidhjen drejt diagnostikimit dhe mund të na ndihmojë ta kuptojmë më mirë autizmin dhe shkaqet pas tij.

Studiuesit europianë studiuan gjakun e 38 fëmijëve italianë të diagnostikuar me ASD dhe e krahasuan me gjakun e 31 fëmijëve që nuk vuanin nga autizmi. Fëmijët me autizëm ishin 7 vjeç e gjysmë, mesatarisht. Tek këta fëmijë, studiuesit gjetën shenja të proteinave të dëmtuara në plazmën e gjakut, shkaktuar nga oksigjeni ose glukoza.

Më pas, ata krijuan katër algoritme parashikues, të cilët përpunonin të dhënat dhe dilnin në përfundimin a vuan një fëmijë nga autizmi a jo. Algoritmi më i suksesshëm kërkonte për nivele të larta të një molekule të quajtur dityrosine, e cila shfaqet kur proteinat oksidohen, dhe nivele të larta të proteinave a yndyrnave të tjetërsuara nga kontakti me glukozën. Ky algoritëm parashikonte saktë praninë e autizmit 90% të rasteve dhe mungesën e tij 87% të rasteve.

“Ne presim që testi ynë të përmirësojë nivelin e saktësisë në diagnozat e autizmit, nga 60-70% i cili arrihet nga ekspertë të çrregullimeve neurologjike, në 90%. Dhe presim t’ua ofrojmë si shërbim spitaleve të pajisura ose jo me ekspertë neurologë,” thotë Naila Rabbani, drejtuesja e studimit, biologe.

Përveçse krijuan një test gjaku që diagnostikon autizmin, studiuesit besojnë se gjetjet e tyre sugjerojnë se proteinat dhe yndyrnat e tjetërsuara nga kontakti me glukozën dhe proteinat e oksiduara mund të jenë shkak i simptomave të sindromës. Fëmijët me ASD kishin më shumë shans t’u mungonte një sasi e konsiderueshme aminoacidesh. Ky fakt rikonfirmon teorinë e famshme se disa lloje autizmi shkaktohen nga një mutacion i rrallë gjenetik.

“Nuk kemi studiuar lidhjen e autizmit me vaksinat dhe s’mund të komentoj për këtë çështje,” shton Rabbini.

Analiza është gati, e patentuar dhe grupi i studiuesve po kërkon partnerë komercialë për zhvillimin e mëtejshëm dhe hedhjen në treg.

Burimi: Gizmodo