Aktorja e “Barbie”, Margot Robbie, 35 vjeçe, raportohet se është në bisedime për të luajtur në një version të ri të filmit shumë të diskutuar të vitit 2000, American Psycho.
Filmi origjinal kishte në rol kryesor Christian Bale si vrasësi serial famëkeq Patrick Bateman, por sipas burimeve të The Sun, në versionin e ri, roli do t’i besohet Margot Robbie-t, në një interpretim krejt ndryshe të personazhit.
Bazuar në romanin e vitit 1991 të Bret Easton Ellis, American Psycho ndjek historinë e një bankieri investimesh të fiksuar pas imazhit, i cili udhëheq një jetë të dyfishtë si vrasës serial.
Si libri, ashtu edhe filmi, shkaktuan polemika të mëdha për shkak të skenave të dhunshme dhe përshkrimeve eksplicite.
“Një version i ri i American Psycho po vjen dhe Margot është kandidatura kryesore për të luajtur versionin femëror të Patrick Bateman,” – tha një burim për median britanike.
Sipas burimit, ndryshimi i gjinisë së protagonistit synon të japë një qasje të re ndaj historisë dhe njëkohësisht të heshtë kritikët që e kanë cilësuar romanin dhe filmin si mizogjinist.
“Kur doli romani në vitet ’90, pati shumë reagime për mënyrën se si trajtohej figura e gruas. Duke pasur një vrasëse femër, historia merr një këndvështrim krejt tjetër,” – shtoi burimi.
Ai theksoi se ky rol “i errët dhe kompleks” do të tregojë edhe një herë aftësitë e jashtëzakonshme aktoriale të Margot Robbie-t.
Projekti është ende në fazat e hershme, dhe detajet po përcaktohen, por ekipi që punon pas filmit është “shumë i entuziazmuar” për të nisur xhirimet.
Ironikisht, kjo nuk do të ishte hera e parë që Robbie i afrohet botës së American Psycho: në vitin 2016, ajo interpretoi në një parodi për revistën Vogue, ku imitoi me humor personazhin e Christian Bale në skenën ikonike të rutinës së mëngjesit të Patrick Bateman-it.
