Pamela Genini, modele italiane ka ndërruar jetë pasi është therur 24 herë me thikë nga ish-partneri i saj. Ajo ishte vetëm 29 vjeç. Ngjarja e rëndë ka ndodhur në tarracën e një apartamenti në zonën “Gorla”, Milano dhe për vrasjen e saj akuzohet i dashuri i saj, Gianluca Soncin, 52 vjeç.
Thuhet se fqinjët kanë tentuar të hyjnë në apartament pasi kanë dëgjuar britmat e Pamela-s dhe kanë njoftuar policinë.
Sipas medieve italiane, 52-vjeçari, pasi e kishte tërhequr Pamela-n në tarracë dhe e kishte therur 24 herë, ka tentuar të vrasë veten, duke e goditur veten 2 herë në fyt, në çastin kur pa se autoritetet kishin mbërritur në vendngjarje.
Një ish-partner tjetër i Pamela Genini, me të cilin duket se e ndjera kishte kontakt, u tha autoriteteve se lidhja e saj me 52-vjeçarin kishte shumë tensione dhe ajo planifikonte ta linte. Ajo madje, ishte duke folur me të në telefon, kur pa Gianluca Soncin-in në banesën e saj. Ish-partneri telefonoi menjëherë policinë. Pasi autoritetet thyen derën, panë skenën e tmerrshme dhe modelja ndërroi jetë nga plagët e shumta pak minuta më vonë.
52-vjeçari, i cili po trajtohet në spitalin “Niguarda” të Milanos dhe ndodhet jashtë rrezikut për jetën, dyshohet se ka hyrë në apartament duke përdorur një çelës që e kishte kopjuar disa javë më parë. Ai akuzohet për “vrasje me paramendim”.
Sipas prokurores së Milanos, Alessia Menegazzo, modelja ka pësuar plagë “në qafë, shpinë, kraharor, gjymtyrët e sipërme; gjithsej 24 goditje me thikë”.
Prokurorja shtoi gjithashtu se provat dhe dëshmitë nga personat që e njihnin viktimën tregojnë se partneri e kishte përndjekur atë, ndërsa disa dëshmitarë kanë pohuar se Pamela kishte pësuar “dhunë fizike dhe kërcënime” nga partneri.
