Le të jemi realistë – shumica prej nesh duhet të punojnë. Por mënyra se si e vendosim punën në piedestal dhe si torturohemi duke punuar me orë të zgjatura është 100% zgjedhje personale. 

Një studim i publikuar nga Shoqata për Psikologjinë e Personalitetit dhe Shoqërisë zbuloi se njerëzit që vlerësojnë kohën e lirë më shumë se paranë ndihen më të përmbushur dhe më të kënaqur me jetën. Jepi kohës së lirë një vend më të rëndësishëm në jetën tënde dhe shiko se si do ndihesh!

Në studim morën pjesë mbi 4,600 persona dhe ndarja ishte pothuajse e barabartë: disa që donin më shumë para, disa që zgjidhnin kohën. Por ja ku vjen pjesa interesante: ata që zgjidhnin kohën ishin më të lumtur. 

Po pse ndodh kjo?

Me kalimin e moshës, njerëzit fillojnë të kuptojnë që koha është më e vlefshme se një rrogë e majme. Mund të kesh një llogari bankare të fryrë, por nëse je gjithmonë në zyrë, sa shpesh do kesh pasur mundësi të shijosh jetën?

Një nga autorët e studimit, profesorja e Harvard-it Ashley Whillans, thotë:

"Sa më shumë që rritemi, aq më shumë kërkojmë kuptime më të thella për jetën – dhe kjo rrallë herë lidhet me lekët."

Ajo këshillon: Edhe nëse heq dorë nga disa orë pune për të bërë diçka që të plotëson shpirtërisht, si për shembull punë vullnetare, efekti në lumturinë tënde është shumë më i madh.

E kemi bërë të gjithë gabimin

Edhe vetë Whillans, kur ishte më e re, zgjodhi paratë mbi kohën – "Puno fort tani që të shijosh më vonë", thoshte. Derisa një ditë u zgjua dhe pyeti veten:

“Çfarë kam bërë me jetën time?”

Një mesazh për të rinjtë që duan të punojnë fort tani për të pushuar më vonë - ndoshta nuk ia vlen të shpenzosh vitet më energjike duke u stresuar për rrogën e radhës.

E dini që shumë njerëz nuk i marrin të gjitha ditët e tyre të pushimit në vit? Po, vetëm sepse njerëzit ndihen fajtorë për të bërë pushim. Në një kohë kur stresi është epidemik, a nuk është kjo ironike?

“Kur je i konsumuar, nuk je produktiv, je i acaruar dhe as vetë nuk e di pse je nervoz gjithë kohës - merri pushimet – i ke fituar!”, – thotë Whillans.

Mos zgjidh gjithmonë ofertën që ka më shumë lekë – shiko edhe sa të mbetet për të jetuar.
Sepse në fund, asnjë njeri s’ka thënë ndonjëherë në shtratin e vdekjes: “Ah, sikur të kisha kaluar edhe një orë më shumë në Zoom.”

Burimi: Your Tango