Në një garë që sfidoi kufijtë fizikë dhe u zhvillua në një nga vendet më të vështira dhe historike të Shqipërisë, Red Bull Conquer the Castle riktheu magjinë e saj për herë të dytë, këtë herë në Kalanë e Gjirokastrës.
Përballë një terreni të pjerrët, me mure të larta dhe kalldrëm të vjetër, më shumë se 100 atletë nga komuniteti i fitness-it dhe CrossFit-it sfiduan veten dhe kohën në një garë 1.5 km me pengesa. Garuesit u testuan në forcë, shkathtësi, qëndrueshmëri dhe fokus në një kurs që kërkonte shkathtësi të lartë dhe strategji.
Kjo kala madhështore, e ndërtuar mbi një kodër që dominon qytetin e gurtë, ofroi një terren të jashtëzakonshëm për sfidat fizike dhe psikologjike të garës. Muret e kalasë, rrugicat me kalldrëm, pjerrësia, pengesat e kthyen këtë aktivitet në një përvojë unike për çdo garues.
Koha në këtë event ishte vendimtare: çdo sekondë kishte rëndësi për të përfunduar pengesat dhe për të kaluar vijën e finishit në kohën më të shpejtë të mundshme. Garuesit nisen me distance nga njëri tjetri dhe në fund 24 garuesit me kohën më të mirë e përsëriten edhe njëherë pengesat.
Gara testoi jo vetëm forcën dhe qëndrueshmërinë, por edhe fokusin dhe vendosmërinë e atletëve.
Në finale, 24 atletët më të shpejtë dhe të fortë u përballën për të fituar titullin “Pushtues i Kalasë” në dy kategori: meshkuj dhe femra.
Fituesit e garës ishin:
Meshkuj:
Vendi i Parë: Kevin Hallop (Estoni)
Vendi i Dytë: Hatem Idrizllari
Vendi i Tretë: Jashar Ndregjoni
Femra:
Vendi i Parë: Eulalia Puig Vilardell (Estoni)
Vendi i Dytë: Bleona Koka
Vendi i Tretë: Erjona Bokciu
Garuesit përshkruan garën si një përvojë unike, ku sfidat e relievit të kalasë dhe pengesat e ndërtuara i vunë përpara një prove fizike dhe mendore intensive. Një prej pjesëmarrësve tha: “Terreni është sfidues, dhe eshte hera ime e pare ne Shqiperi dhe nuk e prisja te fitoja garen pasi pengesat kerkon shume pergatitje fizike por do provoja serisht”
Ngjarja solli bashkë sportistë dhe entuziastë nga e gjithë Shqipëria dhe Europa, duke kthyer qytetin historik të Gjirokastrës në një skenë dinamike dhe plot jetë.
Red Bull Conquer the Castle po krijon një traditë që do të vazhdojë të zgjasë dhe të rritet në vite, me synimin për të pushtuar kalatë më ikonike të Shqipërisë dhe për të bashkuar kulturën me sportin në mënyrë unike dhe frymëzuese.
