Ah, ç’të bën shoqëria! Taylor Swift është përmendur sërish në gjyqin mes Blake Lively dhe Justin Baldoni-it, edhe pasi u rrëzua kërkesa për dëshminë e saj. Gjykatësi Lewis Liman vendosi që Justin Baldoni ka të drejtën e aksesit në komunikimet mes këngëtares dhe aktores që lidhen me filmin “It Ends With Us”, sipas dokumenteve të siguruara nga Page Six.
“Kërkesat për të pasur akses mbi mesazhet me Taylor Swift në lidhje me filmin dhe këtë çështje janë të përshtatura në mënyrë të arsyeshme, për të zbuluar informacione që mund të provojnë ose hedhin poshtë pretendimet e Blake Lively për ngacmim dhe hakmarrje,” thuhet në vendimin e gjykatësit.
Megjithatë, mesazhet duhet të jenë të lidhura me filmin e bazuar në romanin e Colleen Hoover, ose me sfidën ligjore mes Blake Justin-it.
Avokatët e aktores së “Gossip Girl” u përpoqën të bëjnë një marrëveshje me ekipin e Baldoni-t, duke thënë se do t’i dorëzonin të gjitha dokumentet që dëshirojnë avokatët e tij, përveç mesazheve me Taylor Swift, në këmbim të “gjithë videove që lidhen me filmin dhe versionet e plota të komunikimeve” të përmendura në padinë e Baldoni-t.
Avokati i Baldoni-t e refuzoi marrëveshjen.
Vendimi i gjyqtarit vjen pasi Blake Lively i kërkoi gjykatës të mbrojë mesazhet me miken e saj, Taylor Swift. Sipas dokumenteve të gjykatës të siguruara nga Page Six, aktorja e “The Age of Adaline” argumentoi se mesazhet “nuk janë thelbësore” për çështjen, por megjithatë, gjykatësi vendosi në favor të regjisorit.
Taylor Swift u përfshi fillimisht në dramën ligjore mes Justin-it dhe Blake Lively në janar, kur u përmend në kundërpadinë prej 400 milionë dollarësh të regjisorit, e cila tashmë është rrëzuar.
Sipas padisë, regjisori i “Five Feet Apart”, e akuzoi aktoren Blake Lively se kishte përdorur statusin e Taylor Swift dhe bashkëshortit të saj Ryan Reynolds për të marrë atë që donte në xhirimet e filmit “It Ends With Us”.
Justin Baldoni pretendon se ishte ftuar në shtëpinë e çiftit të njohur, ku ishte i pranishëm edhe “një mik i famshëm dhe shumë i afërt”, për të diskutuar rishkrime të skenarit.
Avokati i regjisorit, Bryan Freedman, përmendi mesazhe të pretenduara mes klientit të tij dhe Blake Lively-t, ku ajo thuhet se i quante Taylor dhe Ryan “dragonjtë” dhe mbrojtësit e saj.
“Mesazhi nuk mund të ishte më i qartë. Justin nuk po përballej vetëm me Blake, por edhe me "dragonjtë e saj" – dy nga figurat më me ndikim dhe më të pasura në botë – që nuk kishin frikë ta vinin atë në vështirësi,” tha Freedman.
Në maj, Taylor Swift u thirr zyrtarisht si dëshmitare për gjyqin që pritet të mbahet në mars 2026, por kërkesa u tërhoq më vonë. Drama ligjore ka shkaktuar një krisje në marrëdhënien mes ikonës së pop-it dhe aktores. Një burim tha për Page Six se Taylor do të jetë “përgjithmonë e nxehur” me aktoren për faktin që e përfshiu në këtë telash.
