Kevin Spacey pritet të paraqitet sërish në gjykatë në vitin 2026! Aktori fitues i çmimit Oscar do të përballet me padi civile nga tre burra, të cilët pretendojnë se ai i ka sulmuar seksualisht, raportoi BBC të mërkurën, më 26 nëntor.
Burrat kanë paditur aktorin e “House of Cards”, 66 vjeç, duke thënë se ai i ka sulmuar mes viteve 2000 dhe 2013. Çështja do të zhvillohet në Gjykatën e Lartë në Londër tetorin e ardhshëm, sipas BBC dhe Sky News. Procesi pritet të zgjasë tre javë.
Spacey ka mohuar çdo akuzë. Ai i ka mohuar zyrtarisht dy prej padive dhe ende nuk ka paraqitur mbrojtjen për të tretën, raportuan BBC dhe Sky.
Një nga burrat, Ruari Cannon, thuhet se ka hequr dorë nga anonimati. Ai gjithashtu është shfaqur në dokumentarin e vitit 2024 “Spacey Unmasked”, ku ka thënë se aktori e ka prekur në mënyrë të papërshtatshme në një festë pas eventit në teatrin Old Vic të Londrës në vitin 2013. Kevin, raportohet se i ka quajtur pretendimet e tij “të pavërteta dhe se nuk kanë ndodhur kurrë.”
Një tjetër burrë, i identifikuar vetëm si LNP, pretendon se Spacey “e ka sulmuar me qëllim” disa herë gjatë pesë viteve mes 2000 dhe 2005, raportoi BBC. Një i tretë, i njohur në gjykatë si GHI, pretendon se është sulmuar nga Spacey në vitin 2008 në teatrin Old Vic të Londrës, ku ylli i “American Beauty” ka qenë më parë drejtor artistik.
Këto janë akuzat më të fundit me të cilat është përballur aktori. Në vitin 2023, ai u shpall i pafajshëm për nëntë akuza të pretenduara për sulm seksual në gjykatën e Southwark në Londër. Akuzat e tjera fillestare u hodhën poshtë. Aktori shpërtheu në lot ndërsa jepeshin vendimet, raportoi atëherë BBC.
“E imagjinoj se sa shumë prej jush mund ta kuptojnë që ka shumë gjëra që duhet t’i përpunoj pas asaj që ka ndodhur sot, por dua të them se jam jashtëzakonisht mirënjohës ndaj jurisë që mori kohën për të shqyrtuar me kujdes të gjitha provat dhe faktet, para se të arrinte në vendimin e saj dhe jam i përulur nga rezultati i sotëm,” tha ai në një deklaratë asokohe.
