Foto: Getty Images

Shprehja e vjetër që “asgjë e mirë nuk ndodh pas mesnate” duket se ka më shumë të vërteta sesa mendonim. Një studim i ri i publikuar në Proceedings of the National Academy of Sciences zbulon se të shkosh në shtrat herët lidhet drejtpërdrejt me më shumë aktivitet fizik dhe, si pasojë, me shëndet më të mirë.

Të dhënat u mblodhën nga 19,963 të rritur që mbanin pajisje të posaçme në kyçin e dorës për të monitoruar zakonet e gjumit dhe lëvizjes. Në total, mbi 5.9 milionë net të analizuara treguan se personat që flinin rreth orës 21:00 ishin më aktivë fizikisht ditën tjetër, mesatarisht 30 minuta më shumë krahasuar me ata që flinin në orën 01:00. Edhe krahasuar me ata që flinin në orën 23:00, ndryshimi ishte i ndjeshëm: rreth 15 minuta aktivitet më shumë.

Pra, edhe pse të gjithë kemi të njëjtat 24 orë në ditë, rezulton se mënyra si i përdorim orët e gjumit ka rëndësi. Ata që shkojnë në shtrat më vonë, nuk është se janë më dembelë, thjesht rutina sociale e ditës është e ndërtuar për të favorizuar ata që ngrihen herët. Studiuesit zbuluan gjithashtu se edhe kur njerëzit që normalisht flinin vonë kalonin në një orar më të hershëm, niveli i aktivitetit fizik të nesërmen rritej ndjeshëm.

Duke qenë se aktiviteti fizik lidhet me pothuajse çdo përfitim të mundshëm shëndetësor, përfshirë edhe ngadalësimin e plakjes biologjike me disa vite, kjo është një arsye më shumë për të bërë paqe me orarin e hershëm të gjumit.

Sipas studiuesve, promovimi i gjumit dhe aktivitetit fizik nuk duhet të bëhet veç e veç, por në një mënyrë të ndërthurur. Shkurt: fli më herët, lëviz më shumë, jeto më gjatë.

_{Burimi: Inc.}