Justin Trudeau dhe Katy Perry ndezën spekulime për një lidhje romantike këtë javë, pas disa daljeve së bashku në Montréal dhe në fakt, ku ka zë, s’është pa gjë, pasi burime për revistën People thonë se mes tyre mund të jetë duke u krijuar një romancë.
Një burim thotë se mes tyre kishte tërheqje dhe se tani të dy janë të lirë, pasi Katy u nda nga Orlando Bloom. Megjithatë, burimi shton se zhvillimi i kësaj lidhjeje mund të përballet me pengesa për shkak të jetës së ngarkuar personale dhe profesionale së të dyve.
“Janë të interesuar për njëri-tjetrin, por do të duhet kohë për të parë se ku do të shkojë kjo marrëdhënie. Ajo është në udhëtime të vazhdueshme nëpër botë, ndërsa ai po e rindërton jetën tani që nuk është më kryeministër i Kanadasë. Por, mes tyre ka tërheqje. Kanë shumë gjëra të përbashkëta”, u shpreh burimi, duke shtuar:
“Muzika është një nga gjërat që mund t’i ndajë, ndërsa optimizmi është një tjetër. Të dy janë idealistë dhe ende jetojnë në një botë ku besojnë se mund të sjellin përmirësime, edhe pse tani është më e vështirë”.
Justin Trudeau, 53 vjeç, u nda nga bashkëshortja Sophie Grégoire në vitin 2023, pas 18 vitesh martesë. Ata kanë tre fëmijë adoleshentë. Ndërkohë, Perry, 40 vjeçe, konfirmoi në fillim të korrikut fundin e fejesës me Orlando Bloom, me të cilin solli në jetë vajzën Daisy në vitin 2020.
“Përgjegjësitë personale të secilit mund ta ngadalësojnë këtë lidhje, por ka mënyra që ata të takohen dhe njëkohësisht të përmbushin përgjegjësitë si prindër”, thotë burimi.
“Së pari, secili ka një ish-partner, kështu që detyrat ndahen. Edhe pse lidhjet në distancë janë të vështira, për këta të dy mund të jetë e mundur”.
Javën e kaluar, Katy dhe Justin u fotografuan duke shëtitur një qen në parkun Mount Royal në Montréal, përpara se të shijonin një darkë në restorantin lokal “Le Violon”.
Dyshja u takua me shefin e kuzhinës Danny Smiles gjatë darkës dhe më pas shkuan në kuzhinë për të falënderuar stafin. Sipas TMZ, ata shijuan kokteje dhe disa pjata të ndryshme, por nuk u panë duke shfaqur ndonjë gjest romantik në publik.
