Diane Keaton ka ndërruar jetë nga pneumonia, kanë bërë të ditur familjarët e aktores së famshme, ndërsa kanë shprehur mirënjohjen e tyre për reagimin “e jashtëzakonshëm” të njerëzve për lajmin e trishtë.
“Familja Keaton është thellësisht mirënjohëse për mesazhet e jashtëzakonshme të dashurisë dhe mbështetjes që kanë marrë këto ditë në emër të së dashurës së tyre Diane, e cila ndërroi jetë nga pneumonia, më 11 tetor,” thuhet në deklaratën e familjes për revistën People.
Ata u bënë thirrje të gjithë atyre që dëshirojnë të bëjnë dhurime në nder të saj, t’i drejtohen kauzave që ajo vetë mbështeste:
“Ajo i donte shumë kafshët dhe ishte e palëkundur në mbështetjen e saj për komunitetin e pastrehë, ndaj çdo dhurim në kujtim të saj për një bankë lokale apo një strehë për kafshë do të ishte një homazh i mrekullueshëm dhe shumë i vlerësuar.”
Diane ndërroi jetë në Kaliforni në moshën 79-vjeçare. Ajo ishte një ikonë unike e kinemasë që nga roli i saj fitues i Oscarit në filmin “Annie Hall” (1977), për të cilin regjisori, skenaristi, partneri në film dhe ish-i dashuri i saj Woody Allen, u frymëzua nga jeta e saj e vërtetë. Diane ka luajtur në disa nga filmat më të rëndësishëm të gjysmës së dytë të shekullit të kaluar, përfshirë sagën e “The Godfather”, “Reds”, “Marvin’s Room”, “Something’s Gotta Give”, “Father of the Bride” dhe “The First Wives Club”.
Vdekja e saj shkaktoi tronditje në gjithë Hollywood-in dhe në mbarë botën; megjithëse ajo nuk ishte shfaqur publikisht prej disa muajsh. Pas vdekjes, revista People citoi një burim të afërt me aktoren, i cili tha se shëndeti i saj “u përkeqësua shumë papritur” muajt e fundit dhe se madje edhe shumë nga miqtë e saj të vjetër “nuk ishin plotësisht në dijeni të asaj që po ndodhte.”
Ish-kolegët e saj, përfshirë Woody Allen, Jane Fonda, Keanu Reeves, Leonardo DiCaprio, Robert De Niro dhe Meryl Streep, i kanë bërë homazhe të ndjerës.
Diane Keaton nuk u martua kurrë. Ajo lë pas dy motrat e saj më të vogla, Dorrie dhe Robin, si dhe dy fëmijët e saj, vajzën Dexter dhe djalin Duke, të cilët i adoptoi.
“Mëmësia më ka ndryshuar plotësisht,” është shprehur ajo, duke shtuar: “Është ndoshta përvoja më thellësisht përulëse që kam pasur ndonjëherë.”
