Në mëngjesin e ditës së sotme, 19 shkurt 2026, Policia e Thames Valley arrestoi Andrew Mountbatten-Windsor, i njohur më parë si princ Andrew, në rezidencën e tij Wood Farm rastësisht në ditëlindjen e tij të 66. Ai dyshohet se ka ndarë raporte konfidenciale qeveritare me jeffrey Epstein dhe aktualisht nddhet në paraburgim ndërsa hetimet vazhdojnë.
Në një deklaratë të rrallë publike, mbreti Charles III tha se çështja duhet të trajtohet përmes një procesi “të plotë, të drejtë dhe të rregullt” nga autoritetet përkatëse, duke shtuar se familja mbretërore do të vazhdojë detyrën dhe shërbimin ndaj publikut.
Detajet e plota të akuzave nuk janë bërë ende publike. Megjithatë, autoritetet britanike po shqyrtojnë pretendime se Andrew, gjatë kohës kur shërbente si i dërguar tregtar i Mbretërisë së Bashkuar (2010–2011), i ka dërguar Epstein raporte konfidenciale mbi vizita zyrtare në Singapor, Kinë, Hong Kong dhe Vietnam.
Këto pretendime dolën pas publikimit të dokumenteve nga Departamenti Amerikan i Drejtësisë në janar 2026. Mes tyre ishte një email drejtuar dikujt të quajtur “The Duke”, që më pas i ishte përcjellë Epstein-it, me bashkëngjitje raporte vizitash në Azinë Juglindore. Një tjetër email fliste për një mundësi investimi në Afganistan.
Dokumentet përfshinin gjithashtu një fotografi të Andrew me një grua (fytyra e së cilës ishte e mbuluar), por konteksti dhe koha e realizimit të saj mbeten të paqarta.
Policia po shqyrton edhe një akuzë të re sipas së cilës Epstein kishte dërguar një grua në rezidencën Royal Lodge të Andrew në Windsor në vitin 2010 “për qëllime seksuale”. Autoritetet kanë deklaruar se po e vlerësojnë informacionin sipas procedurave standarde.
Andrew ka mohuar vazhdimisht çdo shkelje ligjore në lidhje me Epstein.
Lidhjet e Andrew me Epstein kanë qenë burim polemikash prej vitesh. Në vitin 2019, gjatë një interviste në emisionin Newsnight të BBC-së, ai mohoi njohjen me Virginia Giuffre (e cila deklaroi publikisht se ishte detyruar të kishte marrëdhënie seksuale me disa burra me ndikim, përfshirë princin Andrew) dhe vuri në dyshim autenticitetin e një fotografie ku shfaqej me të dhe me bashkëpunëtoren e Epstein-it, Ghislaine Maxwell, e cila aktualisht po vuan një dënim 20-vjeçar për bashkëpunim në abuzim seksual të të miturve.
Në janar 2022, Andrew humbi titujt ushtarakë dhe patronazhet mbretërore mes një padie civile për abuzim seksual, e cila u zgjidh jashtë gjykate. Në fund të vitit 2025, pas akuzave të tjera të reja, ai humbi edhe titujt e mbetur mbretërorë dhe u largua nga rezidenca e tij në Windsor, duke u zhvendosur në Wood Farm në fillim të shkurtit 2026.
Kryeministri britanik Keir Starmer deklaroi: “Askush nuk është mbi ligjin,” duke theksuar se kushdo që ka informacion duhet të dëshmojë.
Arrestimi i Andrew Mountbatten-Windsor përbën një moment të pazakontë në historinë moderne britanike. Çështja ngre pyetje të thella mbi privilegjin, përgjegjshmërinë dhe të ardhmen e monarkisë.
