Procesi gjyqësor ndaj Sean "Diddy" Combs ka hyrë në fazën e vendimit me një nisje të tensionuar, pasi trupi gjykues që do të vendosë për fatin e tij është përfshirë në përçarje që në orët e para të diskutimeve.
Pas gjashtë javësh dëshmi dhe prova në Gjykatën Federale në New York, vetëm dy orë pasi çështja iu dorëzua trupit gjykues, një shënim iu dërgua gjyqtarit, ku anëtarët shprehën shqetësimin se një prej tyre, nuk po respektonte udhëzimet e gjykatës. Pa dhënë shumë detaje, gjykatësi Arun Subramanian u përgjigj me një rikujtesë formale për përgjegjësinë e trupit gjykues.
Diddy po përballet me pesë akuza të rënda: trafikim seksual, transport për prostitucion dhe pjesëmarrje në një organizatë kriminale, për të cilat ai ka deklaruar pafajësi. Gjatë gjykimit, prokurorët sollën 34 dëshmitarë, përfshirë ish-punonjës, ish-partnere dhe persona që e akuzojnë atë për sjellje abuzive, duke përshkruar një sistem të tërë ku Diddy përdorte ndikimin e tij për të manipuluar, detyruar dhe abuzuar me gra në skenarë të quajtur “freak offs” – orgji të zgjatura me eskorta dhe drogë.
Një nga dëshmitë më të rëndësishme ishte ajo e këngëtares Cassie (Casandra Ventura), e cila përshkroi marrëdhënien e saj 11-vjeçare me Diddy si të dhunshme dhe psikologjikisht shkatërruese. Ajo tregoi se në fillim pranonte të merrte pjesë në “freak offs” për ta bërë atë të lumtur, por më vonë kishte nevojë për substanca për t’u shkëputur nga realiteti.
Një video e siguruar nga një hotel luksoz në Los Angeles, që u paraqit në gjyq, tregonte Diddy-n duke e ndjekur Cassie-n nëpër korridor, duke e hedhur përtokë, e duke e goditur me shqelma. Ai më pas dyshohet se ka paguar 100,000 dollarë për ta blerë videon nga punonjësit e hotelit, me pretendimin se publikimi i saj “do t’i shkatërronte karrierën”.
Mbrojtja e tij nuk solli asnjë dëshmitar dhe përfundoi paraqitjen e saj brenda disa orësh. Avokatët e Diddy-t u mbështetën në kundërshtimin e dëshmive të prokurorisë, duke i paraqitur ngjarjet si pjesë e marrëdhënieve personale, ndonëse problematike, dhe jo si krime të organizuara. Ata pranuan se ka pasur dhunë në marrëdhënie, por mohuan çdo përfshirje në trafikim seksual apo veprime mafioze.
Pjesëtarët e trupit gjykues janë udhëzuar të vendosin nëse ka prova për ekzistencën e një organizate kriminale ku Diddy ka luajtur rol udhëheqës dhe ka kryer të paktën dy veprime të paligjshme si pjesë e saj, përfshirë rrëmbim, zjarrvënie, ryshfet dhe manipulim të dëshmitarëve.
Dënimi maksimal për akuzat kryesore është burgim i përjetshëm. Trupi gjykues u pa duke nënvizuar pjesë të udhëzimeve të gjykatësit dhe duke bërë shënime, por atmosfera mes tyre dukej e brishtë.
E ardhmja e një prej figurave më të mëdha të industrisë muzikore është në balancë dhe, nëse trupi gjykues nuk arrin një vendim të qartë, rrezikohet përsëritja e gjithë procesit. Ndërkohë, Diddy qëndron i heshtur, pa dëshmuar, duke pritur gjykimin e fundit për një çështje që mund të shënojë fundin e një epoke për të.
Burimi: NBC News
