Gjatë një bisede në podkastin “Khloé in Wonder Land”, Kim Kardashian ndau një histori nga e shkuara, kur ajo kishte përdorur mikeshën e saj Britney Spears për të marrë pakëz vëmendje.
“Fama ishte gjithçka që doja, jetoja për të,” tha ajo.
Një person me të cilin po darkonte në atë kohë kishte një Rolls-Royce Phantom, ndërsa ajo dhe miku i saj Jonathan Cheban, mezi arrinin të gjenin një taksi.
“Prandaj i thamë: ‘A mund të na çosh deri në hotelin tonë?’”, tregoi ajo, duke shtuar se ai pranoi.
Miku i saj i sugjeroi që të dy ata të uleshin në sediljet e pasme, për t’u dukur sikur kishin një shofer personal.
Kardashian kujtoi momentin kur mbërritën në hotel dhe fotografët ishin kudo dhe duke pritur Britney-n.
“Ata filluan të thërrisnin: ‘Kim, Kim, je këtu për të vizituar Britney-n?’ Dhe Jonathan më tha: ‘Mbaje kokën ulur dhe mos thuaj asgjë.’”
“Më pas hymë brenda dhe u futëm në një kabinë telefonike brenda hotelit, pasi nuk njihnim asnjë aty. Nuk e dinim as nëse kishte ndonjë lokal ku mund të qëndronim.”
Kim tregoi se ajo dhe Jonathan Cheban qëndruan në kabinën telefonike për rreth 20 minuta, përpara se të largoheshin.
Ajo kujtoi se, ndërsa po dilnin, fotografët thuajse të çmendur e pyesnin: “Kim, si ishte Britney?”
“Morëm një taksi, sepse personi që kishte Rolls-Royce-in na kishte lënë aty, por fotografët nuk do të na fotografonin duke hipur në makinë. Kështu ne i mashtruam të gjithë” tha ajo.
“Fotot ishin në faqen e parë të çdo reviste. Ne menduam se po bënim namin,” shtoi Kardashian.
Britney Spears dhe Kim Kardashian u njohën në fillim të viteve 2000, përmes mikeshës së përbashkët Paris Hilton. Dyshja duket se e ka ruajtur miqësinë ndër vite, ato madje kaluan një mbrëmje së bashku nëntorin e shkuar.
