Ditën e sotme, në programin financiar të CNBC-së, Squawk Box, David Beckham komentoi pak mbi përdorimin e rrjeteve sociale dhe shëndetin mendor.
Sipas tij, ai gjithmonë është përpjekur t'u mësojë fëmijëve të mirat e të këqijat e këtyre platformave.
“Gjithmonë kam folur për rrjetet sociale dhe fuqinë e tyre. Për të mirën dhe për të keqen që kanë. E keqja lidhet me atë që fëmijët mund të kenë akses në këto ditë dhe mund të jetë e rrezikshme. Por ajo që kam vënë re personalisht, veçanërisht me fëmijët e mi, është se duhet përdorur për arsyet e duhura. Kam patur mundësinë ta përdor platformën dhe ndikimin tim për UNICEF-in, dhe ka qenë një mjet jashtëzakonisht i dobishëm për t'i bërë njerëzit të ndërgjegjësohen mbi atë çfarë po ndodh në botë me fëmijët.”
Kjo deklaratë vjen një ditë pas rrëfimit të Brooklyn në Instagram, mbi tensionin në marrëdhëniet mes tij, partneres dhe prindërve.
Edhe pse ndonjë koment të drejtpërdrejtë mbi situatën nuk pati, kjo ndoshta sepse roli i babait nuk e lejon të bëjë të tilla skena në publik. Ai tha se fëmijët (sidomos Brooklyn) “kishin bërë gabime” në këto platforma, por një prind i mirë ia lejon edhe lajthitjet fëmijës së tij.
“Jam përpjekur të bëj të njëjtën gjë me fëmijët e mi, t’i edukoj. Ata bëjnë gabime, por fëmijët lejohen të bëjnë gabime. Kështu mësojnë. Kjo është ajo që unë mundohem t’u mësoj atyre. Ndonjëherë duhet t’i lejoni të bëjnë edhe gabime.”
E vetmja gjë që mund të themi është se sado i qetë të shfaqet David-i përpara kësaj situate, "gabimi" i djalit të madh do t'ia lodhë jo pak kokën atij dhe Victoria-s disa kohë.
